បុណ្យរំឭកគុណគ្រូ Post Date: 04 November , 2022

ពិធីបុណ្យរំឭកគុណគ្រូ

នៅរសៀលថ្ងៃសៅរ៍ ០៥កើត ខែកត្តិក ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី២៩ ខែតុលា ឆ្នាំ២០២២ សាខាពុទ្ធិកសាកលវិទ្យាល័យព្រះសីហនុរាជ ខេត្តបាត់ដំបង បានរៀបចំពិធីបុណ្យរំព្ញកគុណគ្រូ និង ប្រគេន-ជូនទេយ្យទានចំពោះសាស្រ្តាចារ្យ។ កម្មវិធីនេះប្រារព្ធឡើងក្នុងសាលប្រជុំលោកជំទាវ ខៀវ ស៊ីណា ជា ចាន់តូ នៅអគារសម្ដេចព្រះសុមេធាធិបតី នន្ទ ង៉ែត (អគារថ្មី) ដែលដឹកនាំដោយសមណនិស្សិត និស្សិត ថ្នាក់ឆ្នាំទី៤ ទាំង៥ឯកទេស រួមមាន រដ្ឋបាលអប់រំ អក្សរសាស្រ្តខ្មែរ គ្រប់គ្រងទូទៅ អង់គ្លេស និង ឯកទេសច្បាប់។

កម្មវិធីនេះប្រារព្ធឡើងក្នុងបំណងដើម្បីការតបគុណចំពោះលោកគ្រូ-អ្នកគ្រូសាស្ត្រាចារ្យដែលបានខិតខំបង្ហាត់បង្រៀនអស់រយៈកាលជិតបួនឆ្នាំកន្លងមកនេះផង និងមួយចំណែកទៀតគឺដើម្បីបានជួបជុំសមណនិស្សិត-និស្សិតថ្នាក់ឆ្នាំទី៤ គ្រប់រូបមុននឹងបញ្ចប់ការសិក្សារបស់ខ្លួននៅសាខាពុទ្ធិកសាកលវិទ្យាល័យព្រះសីហនុរាជ ខេត្តបាត់ដំបងនេះផង។

កម្មវិធីនេះបានប្រព្រឹត្តទៅក្រោមអធិបតីភាព ព្រះមហាបណ្ឌិត វី សុវិជ្ជា (យសបញ្ញា) ព្រះរាជាគណៈថ្នាក់កិត្តិយស និងជាព្រះប្រធានសាខាពុទ្ធិកសាកលវិទ្យាល័យព្រះសីហនុរាជ ខេត្តបាត់ដំបង ព្រះបញ្ញាមុនីញាណ ហាក់ សៀងហៃ ព្រះរាជាគណៈថ្នាក់កិត្តិយស និងជានាយកប្រតិបត្តិអង្គការពុទ្ធសាសនាដើម្បីការអប់រំនៃកម្ពុជា (ព.អ.ក.) លោកគ្រូ ជា សឿន អនុប្រធានសាខាពុទ្ធិសាកលវិទ្យាល័យព្រះសីហនុរាជ ខេត្តបាត់ដំបង ព្រះប្រធាន-ប្រធានការិយាល័យ លោកគ្រូ-អ្នកគ្រូសាស្រ្តាចារ្យ សមណនិស្សិត-និស្សិតគ្រប់ថ្នាក់ឆ្នាំសិក្សា។

ទិវាដ៏ប្រកបដោយមហានក្ខត្តឫក្សនេះ ចាប់ផ្កើមឡើងចាប់ពីម៉ោង ១:០០ រសៀលតទៅ មានការប្រគំឆៃយ៉ាំទទួលការនិមន្ត-អញ្ជើញមកដល់របស់លោកគ្រូ-អ្នកគ្រូសាស្ត្រាចារ្យ គណៈធិបតី ការអាននិងពោលកំណាព្យរបស់សមណនិស្សិត-និស្សិតជូនចំពោះលោកគ្រូ-អ្នកគ្រូសាស្ត្រាចារ្យ ការផ្ដល់មតិយោបល់ពីលោកគ្រូ-អ្នកគ្រូសាស្ត្រាចារ្យ ការនិមន្តចំណេះសំណាលរបស់ព្រះយសបញ្ញា បណ្ឌិត វី សុវិជ្ជា ព្រះបញ្ញាមុនីញាណ ហាក់ សៀងហៃ ការប្រគំឆៃយ៉ាំដោយនិស្សិត ព.ស.ស.ប.ប ការច្រៀងចម្រៀងគុណគ្រូ កម្មវិធីចាប៉ីដងវែង ការខមាទោស និងជូនទេយ្យទានដល់លោកគ្រូ-អ្នកគ្រូសាស្ត្រាចារ្យ ហើយទីបំផុតមានការថតរូបអនុស្សាវរីយ៍ជុំគ្នាជាការបង្ហើយកិច្ចកម្មវិធី។

...

ការថតរូបអនុស្សាវរីយ៍ជុំថ្នាក់ដឹកនាំព.ស.ស.ប.ប សាស្ត្រាចារ្យ និង សមណនិស្សិត-និស្សិតក្នុងកម្មវិធីបុណ្យរំឭកគុណគ្រូ

...

ការប្រគេនទេយ្យទានចំពោះថ្នាក់ដឹកនាំព.ស.ស.ប.ប និងសាស្ត្រាចារ្យជាបព្វជិត

...

ពិធីខមាទោសនិងជូនទេយ្យទានចំពោះសាស្ត្រាចារ្យ

...

ថ្នាក់ដឹកនាំព.ស.ស.ប.ប និងសមណនិស្សិត-និស្សិតថ្នាក់ឆ្នាំទី៤ ដែលជាអ្នករៀបចំកម្មវិធី

...

...